她來自江湖（1） 留不住彩虹

她來自江湖 （1） 留不住彩虹


。。。「小馬？」

小馬無回應，仍然好入神咁，望住天空上雨後留下嘅烏雲。。。同彩虹。





霍天行無將聲浪提高，只係行近到小馬身邊，再叫一聲，

「小馬。」

小馬即時彈起，

「嘩！師傅！。。畀你嚇鬼死呀！」

霍天行只係微笑，

「睇乜嘢，睇得咁入神呀？」

小馬回答，

「彩虹呀，師傅，條彩虹好靚。。真係好靚，特別係喺暴雨之後，啲雲仍然烏黑未清。。條彩虹顯得更靚，就好似一個新希望咁。。。」


正當小馬講解時，霍天行反而面上微笑凝止，好似。。唔多認同小馬。。乜。。呢個老坑，唔係成日「唱好」明天又是新的一天，新的一天，新的希望嘅咩？

點解今次。。。

因為，霍天行明白到一點，小馬呢一刻迷住於彩虹，暴雨後嘅色彩，的確好美麗，不過。。當新希望真正來臨之前。。。

彩虹，必然會消失。。小馬嘅迷戀，只會令佢再度失去，想抓住一啲無法子抓住嘅事物，只會被自己嘅執著。。執著住困擾。。執著住痛苦。

不過霍天行呢刻，並無掃小馬慶，因為呢位師傅，永遠都會畀人一種舒服，安全，嘅感覺，一種「平安」嘅感覺。

有人常言，「有所不為，有所必為」。。呢一刻，正當小馬「享受」緊時，就咪撚掃人慶啦。

呢一刻，係應該珍惜，應該去享受，而小馬既然享受緊，就由得佢吧。

其實，除咗彩虹留不住之外。。乜。。有嘢可以留得住的嗎？

霍天行乘機入小馬位，「過料」畀佢，

「小馬，宇宙浩瀚，上至無盡星雲，下至一朵小花，一切，其實都好靚，只要你細心咁去欣賞。。四季不息，各有特色，留不住，就由得佢留不住。。經歷，使人成長。。呢一點，你要記住啊。」

「師傅，嗯，我會記住㗎嘞。」

（嘻，多年之後。。或者啦）

霍天行再加，

「而宇宙本身，及一切，都運行喺一個「律」之中，一切，都有一個「秩序」，順之，則「順天而行」。

宇宙，有宇宙嘅秩序。

社會，有社會嘅秩序。」

小馬聽住之際，突然間，

「師傅。咁，江湖呢？

江湖。。嘅秩序又係乜呀？」

霍天行似乎無出奇小馬突然間問啲好似「離題」嘅問題，因為佢知道小馬轉數快，天份高，個腦就好似天馬行空，孫悟空筋斗幾下，就去到天腳底，不過，佢無直接回答，反而回問一條更「離題」嘅問題，

「小馬，你有冇去過「油麻地戲院」睇戲呀？」

小馬即時面上一紅，霍天行仍然面上掛笑，

「放心，師傅唔係笑你咸濕，師傅後生時，都耐唔耐去「油麻地戲院」睇下工娛場咁㗎。」

小馬就住喺「佐敦」，當然有去，仲周不時同亞偉放咗學，返屋企擺低書包換咗衫，就一人一份報紙挾喺格甩底咁入場。

小馬面紅答，

「有。」

霍天行問，

「咁。。「油麻地戲院」嘅「秩序」，又係乜吖？」

哈，「油麻地戲院」嘅「秩序」？。。有嘅咩？

有。

霍天行知。

小馬知。

霍天行知小馬知。

筆者都知。

去「油麻地戲院」睇過戲嘅男人都知。

。。。唔知嘅，下一集話大家知。