師傅佢乜都識，不過我響佢度，只係學會「炒股」，「溝女」就係我自己「苦練」番嚟，唔知師傅呢範掂唔掂，我不嬲都覺得佢唔掂，如果唔係，我大把「師母」啦，不過，我又從未見過師傅有嘢唔掂嗰喎。
”係呢，雲，嚟搵師傅，乜你有嘢唔掂咩？”
”嘩，師傅，乜你咁講呀，我係突登買Lipton 嚟比你飲架。”
”哈，無事不登三寶殿，有嘢唔掂，你識得嚟搵師傅，師傅都開心嗰喎，起碼，你個心，都仲有師傅存在，仲識買啲咁方便嘅Lipton茶包，on sale 呀呢隻？”
”師傅真係能知天下事呀，犀利呀，師傅。”
”咁，呢個禮拜隔離街超市有乜on sale，啲師奶仔都知啦，好吖，不愧為師嘅教道，「物盡其用」，炒股炒成點呀？okay 吖嘛？”
”Okay.........。”
”咁.....乜你唔係一直覺得師父溝女唔掂嘅咩？......咁，我有乜嘢可以幫到你呢？”
”師傅你又知我溝女方面有「問題」？”
”唉....，雲，你仲有幾多招吖，唔係「錢」，就「女人」，你由細到大，「溝女」一唔掂擋，就嚟搵我，每一次，我都幫你唔到，但，你又每一次，都會嚟搵我嗰喎。”
我終於記得點解，我覺得師傅「溝女」唔掂喇，因為撻嚫Q搵佢，佢都幫我唔到。不過，我又真係次次都搵佢。
因為....原來......我除咗自己，仲有我師傅 -- 霍天行。
”雲，呢次條「女」，係咪「自己」架？”
Shit.....我只有好「巧妙」咁回答，
”........呀....想係....想佢係...。”
”乜你次次....都同一答案嘅，背一次 : 「律」，比師傅聽，睇你仲記唔記得？”
”係，師傅。......「律」，
「 天地萬有間，
歸宗為一「律」，
人若依「律」行，
事皆為善美，
人偏逆「律」走，
惡果必當然。
早知今日，何必當初。
何為這個「律」？
良心會話你知。 」
雖然只係短短幾句，但....背到最尾，我心口就悶住不暢，好似連呼吸都有困難.....，再一想起可儀段留言.....鰓亦開始又騷又酸。
”點呀....雲？冇依「律」而行呀？”
我底頭....强忍淚水....但當我諗到以後再見唔到可儀.....佢個BB冇咗？.......「地中海」打佢？......。
我再忍唔住，我跪咗響師傅面前，頭仍然dup底，涙水就滴響室頭哥上嘅手背，
”師傅......我做錯咗....不過...我依家好辛苦呀........。”
師傅用手摸摸我頭頂，再用對我年幼時，嘅叫我方法，
”小馬，「好心」都會「做壞事」，錯，就每個人都會有，知錯，方而能改，一步一步嚟啦，方向正確，係第一步。”
”師傅.....不過我次次都好似衰同一範....我....改唔到呀...好慘，好辛苦......。”
”小馬，你，唔係改唔到....。你，只不過係未改到啫....。你，依家咪響度改緊囉....。”
”但係.....我呢刻，真係好辛苦....好辛苦....。
”放心啦，雲，以往，你咪又曾辛苦過....之後，就係新嘅一日，有「當初」，就有「今日」，不過，亦都會有「新一日」。
所以，聽日，就係新嘅一日，你只需要放開你嘅「難過」，你嘅「難過」，就自己會走架喇。”
=========================
師傅成日都啱嘅，不過其實，嗰番話，我都聽過好多次，因為縱然，舊嘅「難過」走咗，新嘅「難過」又會嚟，新嘅一日，帶嚟新嘅希望，可惜「失去」同「得著」，始終，好似永遠分唔開。
而我，就....如天上嘅雲，無定地繼續飄浮.....。
天上，亦見到好多雀仔，只見佢哋伴隨住我，不停地飛，即使攰喇，但都無奈地繼續。
因為....佢哋係冇腳嘅「停不鳥」，停不了。
全集完。
No comments:
Post a Comment